آداب يجب مراعاتها:ــــــ
لما نتصل بحد ع الموبايل فيه أداب لازم نراعيها لأننا مش بنبقى عارفين حال الشخص اللي بنتصل بيه ، فاضى ولا مشغول ، زعلان ولا فرحان ، سليم ولا تعبان ومنها :
لو مردش أو كنسل مينفعش لأى سبب نتصل أكتر من مرتين ورا بعض ، ومينفعش تتصل 5 أو 6 مرات فى نفس اليوم
لو الامر عاجل جداا نبعت رساله نصيه انك محتاج تكلمه عشان كذا وكذا .
لو هنتكلم فى موضوع طويل لازم نسأل في بداية المكالمة اذا وقته يسمح ولا لأ .
لو طلع مش مسجل الرقم بلاش نضيع من وقته نص ساعه فى كلام من عينة ( فكر كده ، طب أفتكر ، معقول مش عارفني ، إنت مش مسجل نمرتي ، إنت مسحت نمرتي !!!
إذا كنت هتبلغه بمصيبه لقدر الله أو خبر غير سار ، فلازم تتحرى حاله وتتأكد ان الوقت مناسب لأبلاغه بيها ووضعه الحالي يسمح بإستقبال الخبر حتي لا يتسبب الخبر في ضرر له لحظي ..
ونفس الكلام بالنسبه لرسائل الفيس بوك والايميل والواتس ..
اذا بعت رساله وشافها ومردش التمس ليه العذر ..
اذا اتاخر عليك كذا يوم بلاش تتقمص ، يمكن مشغول ونسي ، ابعت رساله بلطف فكره بطلبك ..
عادي جدا ان حد يكون أون لاين وميردش عليك لان دلوقتي ناس كتير شغلها بقي متعلق بالفيس بوك والواتس وبيبقي عندهم ضغط رسايل ..
لما تكون محتاج حاجه أدخل في الموضوع على طول بلاش مقدمات وتقول السلام عليكم وتستني الرد .. وترد على الرد .. مش كل الناس عندها وقت للشات ، أحسن طريقه هي : "السلام عليكم ، ازيك ، انا محتاج كذا كذا ....
وأخيرا : أحنا بنكلم أو بنبعت للناس وقت ما تكون ظروفنا تسمح بذلك وهما كمان من حقهم يردوا وقت ما ظروفهم تسمح حتي لو بعد كذا يوم ، ومش كون ان ظروفك هادية أو روتينه أو في لحظه فراغ أو إسترخاء فدا مش معناه ان كل الناس عندهم نفس النعمه الى ربنا سبحانه وتعالى أنعم عليك بيها ، والله فيه ناس حياتها مختلفه وزحمه عنك وبيبقي غصب عنها ..
أحسنوا الظن وتقبلوا الأعذار وإلتمسوها حتي لو لم تُقدم في لحظتها ..
لازم نرجع لاخلاق زمان والتماس العذر والتسامح وحب الخير
